Sewentien atlete van Grey is genooi om aan die einde van Maart aan die SA-skole atletiekbyeenkoms in Germiston deel te neem. Bennie Prinsloo is na afloop van die byeenkoms gekies vir die SA-Jeugspan.

Voor die byeenkoms is 63 Grey seuns ook genooi na die Vrystaat byeenkoms.  Slegs 40 het egter deelgeneem a.g.v. die Duineveld-interskool wat terselfdetyd plaasgevind het.

Volgens mnr. Pieter Viljoen, die hoof van Grey se atletiek, was die prestasies van die afgelope seisoen uitstekend.

By die SA-kampioenskappe is daar twee 2de plekke deur Greyseuns behaal.  Bennie Prinsloo en Hanno Bezuidenhout het in die 800m en die 300m hekkies onderskeidelik twee 2e plekke behaal. Bennie is toe ingesluit in die SA-span, wat op 25 – 27 Mei aan die Suidstreek Jeugkampioenskappe in Harare deelgeneem het.  Bennie se kommentaar, “Ek het die SA byeenkoms baie geniet en het in die uitdun en finaal ‘n goeie tyd gehardloop.”  In die SA byeenkoms het hy die 800m vir seuns o/17 ‘n tyd van 1:53, 31 afgelê.

Verder het die Grey-atlete soos volg op die SA’s presteer:  Daar was ‘n 3de plek, drie 4de plekke, ‘n 5de plek, twee 6de plekke asook ‘n 7de plek.  Daar was ook ‘n paar algehele 11de en 12de plekke behaal.  Grey is egter ‘n medalje ontsê toe Masego Sesele in die 100m hekkies finaal gediskwalifiseer is.  Hy het in sy uitdun ‘n vinniger tyd as die finaal se wenner behaal.

Met doelwitte soos Bennie s’n wink daar ‘n blink toekoms: “Ek mik om in 2014 te kwalifiseer vir die Wêreld Junior-atletiekbyeenkoms.”